Azalmaz inhisar
İqtisadçı, müxalif REAL Partiyasının funksioneri Natiq Cəfərli “Azərbaycan Hava Yolları” Qapalı Səhmdar Cəmiyyətindən (AZAL) yazıb.
Əsası 1992-ci ildə qoyulmuş AZAL-ın bütün səhmləri dövlətə məxsusdur.
Novator.az-ın məlumatına görə, Natiq Cəfərli rəsmi statistikaya əsaslanaraq bildirir ki, 2023-cü ilin ilk yarısında Azərbaycanda 2 milyon 464 min nəfər hava nəqliyyatından istifadə edib, sərnişindaşımanın 50,2 faizini AZAL həyata keçirib, qalanı xarici şirkətlərin payına düşüb: “Amma xarici şirkətlərin bir çoxu öz reyslərini AZAL-la birgə həyata keçirib, yəni o reyslərdə də AZAL-ın payı var.
Qiymətin formalaşmasına təsir göstərən yerüstü xidmətlər də AZAL-ın nəzarətindədir, qurum xarici şirkətlərə yerüstü xidmət qiymətlərini diktə edir, bu isə biletlərin baha olmasına gətirir.
Qonşu Gürcüstanda 41 aviaşirkət 60-dan çox istiqamət üzrə uçuşlar həyata keçirir. Dövlət şirkəti olan “Georgian Airways”ın sərnişindaşımada bazar payı cəmi 3 faizdir. İlk yerdə olan şırkətin payı 13 faizə çatmır.
Gürcüstanın hava limanlarında yerüstü xidmətləri özəl şirkətlər həyata keçirir, yəni bu sahə dövlət şirkətinin əlində deyil.
Rəsmi rəqəmlərlə 50 faizdən çox birbaşa bazar payına malik AZAL inhisarçıdır. “Antiinhisar fəaliyyəti haqqında” qanuna görə, bazarda payı 35 faizdən çox olan təsərrüfat subyekti hökmran mövqe tutan hesab olunur və ona qarşı qanun işə düşür. Bəs bu qanun nədən AZAL-a qarşı işləmir? Qanunla dövlət AZAL-ın qiymətqoyma siyasətinə müdaxilə edə, tənzimləyə bilər, amma etmir”.
