Elm və Təhsil Nazirliyinin əsasnaməsi
2022-ci il iyulun 28-də prezident İlham Əliyevin imzaladığı fərmanla Təhsil Nazirliyi Elm və Təhsil Nazirliyinə çevrilmişdi.
2023-cü il iyulun 24-də Elm və Təhsil Nazirliyinin əsasnaməsi açıqlanıb. Sənədə görə, nazirlik elm və təhsil sahəsində dövlət siyasətini və tənzimləməni həyata keçirən, elmi müəssisə və təşkilatların, təhsil müəssisələrinin elm və təhsil fəaliyyətini əlaqələndirən və istiqamətləndirən mərkəzi icra hakimiyyəti orqanıdır.
Nazirliyin fəaliyyətinə prezidentin vəzifəyə təyin etdiyi elm və təhsil naziri rəhbərlik edir. Nazirin prezidentin vəzifəyə təyin etdiyi dörd müavini var.
Elm və təhsil naziri postunu 1982-ci il təvəllüdlü Emin Əmrullayev tutur. O, 2020-ci il iyulun 27-dən 2022-ci il iyulun 28-dək təhsil naziri olub.
Elm və Təhsil Nazirliyinin yanında üç dövlət agentliyi var: Elm və Ali Təhsil üzrə Dövlət Agentliyi, Məktəbəqədər və Ümumi Təhsil üzrə Dövlət Agentliyi, Peşə Təhsili üzrə Dövlət Agentliyi.
