Taksidə yeni qaydalar parlamentdən keçdi
Milli Məclisin 14 iyul iclasında avtomobil nəqliyyatı ilə daşımada yenilikləri nəzərdə tutan qanunlar zərfi son oxunuşdan keçib.
Novator.az bildirir ki, “Lisenziyalar və icazələr haqqında” qanuna dəyişiklik layihəsi sahibkarlıq fəaliyyətinə icazələrin siyahısını genişləndirir, o cümlədən taksi minik avtomobilləri ilə sərnişin daşımalarına buraxılış vəsiqəsi, taksi sifarişi operatoru fəaliyyətinə icazə tələbi qoyur.
“Dövlət rüsumu haqqında” qanunda yeniliklərlə taksi minik avtomobilləri ilə sərnişin daşımalarına buraxılış vəsiqəsinin verilməsinə görə 125 manat, hər bir nəqliyyat vasitəsi üçün buraxılış kartının verilməsinə görə 25 manat, taksi sifarişi operatoru fəaliyyətinə icazənin verilməsinə görə 3000 manat dövlət rüsumu müəyyən olunur.
“Avtomobil nəqliyyatı haqqında” qanunda yeniliklərin biri taksi minik avtomobillərində qət edilən məsafənin və boşdayanmanın müddətinin uçotunu aparan, gediş haqqının məbləğini hesablayan taksometr quraşdırılmasını hökm edir.
Yeniliklərin 2023-cü il oktyabrın 1-dən qüvvəyə minməsi planlaşdırılır.
İnzibati Xətalar Məcəlləsində yenilik təkliflərinə əsasən, daşıma qaydalarının pozulması üzrə cəzalar gəlir. Məsələn, buraxılış vəsiqəsi olmadan taksi minik avtomobilləri ilə sərnişin daşınmasının təşkilinə görə vəzifəli şəxslərə 200 manat, hüquqi şəxslərə 1000 manat, buraxılış kartı olmadan taksi minik avtomobilləri ilə sərnişin daşınmasına görə 50 manat cərimə düşür.
Əməllərin təkrar törədilməsi halında cərimələr artır.
İcazə olmadan taksi sifarişi operatoru kimi fəaliyyət göstərilməsinə görə vəzifəli şəxslər 10000 manat, hüquqi şəxslər 40000 manat cərimələnir.
Cəzaların 2024-cü il yanvarın 1-dən qüvvəyə minməsi nəzərdə tutulur.
