Neçə işsiz sığorta ödənişi alıb?
2023-cü il iyulun 1-nə Azərbaycanda iqtisadi fəal şəxslərin 4934,5 min nəfəri məşğul əhali kimi rəsmiləşib. Novator.az bildirir ki, Dövlət Məşğulluq Agentliyinin qurumları 247 min 430 nəfəri işsiz kimi qeydiyyata alıb, onların 2568-nə işsizlikdən sığorta ödənişi verilib.
Ödənişin orta aylıq məbləği 407,5 manat göstərilir.
“İşsizlikdən sığorta haqqında” qanuna görə, əmək münasibətlərinə əmək müqaviləsinin müddətinin bitməsi əsasları ilə xitam verilmiş şəxslərə ödəniş üçün onların müddətli əmək müqaviləsi üzrə ən azı 2 il 6 ay fasiləsiz iş stajı olmalıdır. Sığorta ödənişi minimum əməkhaqqı qədər ödənir.
Dövlət orqanı və ya hüquqi şəxs ləğvi edildikdə, işçilərin və ya dövlət qulluqçularının sayı və ya ştatları ixtisar edildikdə işsizlikdən sığorta ödənişi üçün azı 1 il sığorta stajı tələb olunur və ödəniş işçinin itirilmiş orta aylıq əməkhaqqının 50 faizi məbləğində hesablanır.
