Arif Hacılı normal iş rejiminə qayıdıb
Müsavat başqanı Arif Hacılının səhhəti qaydasına düşüb, o, partiyada normal iş rejiminə qayıdıb. Novator.az-a bu barədə danışan partiya Divanının üzvü, Mətbuat və İnformasiya Departamentinin rəhbəri Mustafa Hacıbəyli deyib ki, Arif Hacılı iyunun 3-ü Bakıdakı EGE Hospitalda açıq ürək əməliyyatı keçirib, reabilitasiya kursu iyunun 8-dək orada, sonra ev şəraitində – paytaxtda və ata yurdu Zaqatalada – davam edib: “İndi başqan iş başındadır, iyulun 10-dan hər gün mərkəzi qərargaha gəlir, səhhəti normaldır”.
Arif Hacılının ürək-damar sistemində problemlər 2019-cu ildə üzə çıxıb. Həmin ilin yanvarında o, Türkiyədə qısamüddətli müalicə alıb.
Kardioloqların bu il apardığı müayinədə açıq ürək əməliyyatının zəruri olduğu bilinib.
1962-ci il yanvarın 22-də Zaqatalanın Yuxarı Tala kəndində doğulan Arif Hacılı Bakı Dövlət Universitetinin jurnalistika fakültəsini bitirib, Zaqatala radiosunun əməkdaşı olub.
1988-ci ildə milli azadlıq hərəkatına qoşulan Arif Hacılı 1991-1992-ci illərdə Azərbaycan Xalq Cəbhəsinin Ali Məclisinə sədrlik edib.
1990-cı ildə parlamentin deputatı seçilib, Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən partiya başqanının müavini olub.
2003-2005 və 2011-2012-ci illərdə həbsdə yatıb.
2014 və 2019-cu illərdə başqan seçilib.
Arif Hacılı Müsavatın altıncı başqanıdır. 1911-ci ildə qurulmuş partiyaya Məhəmməd Əmin Rəsulzadə, Mirzə Bala Məmmədzadə, Kərim Odər, Məhəmməd Azər Aran, İsa Qəmbər də başqanlıq ediblər.
