Bakı görüşləri
İyulun 6-dan Azərbaycan səfərində olan Albaniya prezidenti Bayram Beqay iyulun 7-də rəsmən qarşılanıb. AZƏRTAC xəbər verir ki, Azərbaycan nümayəndə heyəti Albaniya prezidentinə, Albaniya nümayəndə heyəti Azərbaycan prezidenti İlham Əliyevə təqdim olunub.
İlham Əliyevlə Bayram Beqay əvvəl təkbətək görüşüblər, sonra geniş tərkibdə bir araya gəliblər.
Görüşlərin ardından dövlət başçıları mətbuata bəyanatlarla çıxış ediblər. İlham Əliyev deyib ki, iki ölkə dostluq və qarşılıqlı dəstəyə əsaslanan ikitərəfli əlaqələrdə çox xüsusi dinamika yaradıb: “Biz beynəlxalq təşkilatlarda fəal çalışırıq, ilk növbədə Birləşmiş Millətlər Təşkilatında və İslam Əməkdaşlıq Təşkilatında bir-birimizə dəstək veririk.
Bu gün ölkələrimiz arasında gələcək siyasi münasibətləri, beynəlxalq təşkilatlarda birgə fəaliyyətimizi müzakirə etdik. Eyni zamanda gündəliyimizdə duran ticari, iqtisadi məsələləri, sərmayə imkanlarını nəzərdən keçirdik. Mən bir daha vurğuladım ki, Azərbaycan sərmayədarları Albaniyada istər turizm, istər kənd təsərrüfatı və ya hər hansı digər sahədə sərmayə layihələrini ciddi araşdırmağa hazırdırlar. Hesab edirəm ki, gələn aylarda bizim bu haqda daha çox məlumatımız olacaq və həmçinin münasibətlərimizdə yeni səhifə açılacaq”.
