Azərbaycanın Gürcüstanla ticarəti: rəqəmlər toqquşur
Azərbaycanın Dövlət Gömrük Komitəsinin 2023-cü ilin yanvar-may ayları üzrə hesabatında Gürcüstanla ticarət dövriyyəsi 396,8 milyon dollar göstərilib, bunun 359,5 milyon dolları ixrac, 37,3 milyon dolları idxal kimi rəsmiləşib.
Novator.az bu göstəriciləri Gürcüstanın Milli Statistika Xidmətinin hesabatı ilə tutuşdurub. Həmin hesabata görə, yanvar-may aylarında ölkənin Azərbaycanla ticarət dövriyyəsi 612 milyon dollar dəyərində olub, 336,5 milyon dollar ixrac, 275,5 milyon dollar idxal qeydə alınıb. Azərbaycanın Dövlət Gömrük Komitəsinin hesabatı ilə müqayisədə Gürcüstanın Milli Statistika Xidməti ticarət dövriyyəsini 215,2 milyon dollar çox, Azərbaycana ixracı 299,2 milyon dollar çox, Azərbaycandan idxalı 84 milyon dollar az göstərir.
Novator.az-a danışan iqtisadçı Rövşən Ağayev deyib ki, xarici ticarət statistikasının müqayisəsi zamanı 12-15 faiz kənarlaşmanın ortaya çıxması məqbul sayılır: “Daşıma dövrləri – malın çıxma və çatma tarixləri arasında fərqi, milli valyutaların ABŞ dollarına nəzərən kursu arasında fərqi, fiziki şəxslərin gömrükdən güzəştli şərtlərlə keçirdiyi mallara tətbiq olunan limitlər arasında fərqi nəzərə almaq gərəkdir. Amma kənarlaşma 15 faizi ötürsə, bu, gömrükdə korrupsiyaya, qeyri-leqal ticarətə işarədir”.
