Jurnalistin işdən çıxarılma əmri dəyişdirilib
Azərbaycan Dövlət İnformasiya Agentliyinin (AZƏRTAC) keçmiş müxbiri Aygün Əliyevanın işdən çıxarılması ilə bağlı əmrə dəyişiklik edilib, Əmək Məcəlləsinin 70-ci maddəsinin “c” bəndi üzrə əsaslandırma (peşəkarlıq səviyyəsinin, ixtisasının (peşəsinin) kifayət dərəcədə olmaması) aradan qaldırılıb. Xəbəri iyulun 4-də Qafqazinfo.az yayıb.
Aygün Əliyeva bir neçə il AZƏRTAC-la çəkişmə aparıb. O, 2020-ci ildə işdən çıxarılıb, buna görə məhkəməyə üz tutub. 2021-ci ildə Nəsimi Rayon Məhkəməsi və Bakı Apellyasiya Məhkəməsində çəkişmələr fayda verməyib. 2022-ci ildə Ali Məhkəmə işi Bakı Apellyasiya Məhkəməsinə qaytarıb və həmin instansiya jurnalistin işə bərpası və ona təzminat ödənməsi barədə qərar çıxarıb. Ancaq AZƏRTAC rəhbərliyi həmin qərardan Ali Məhkəməyə şikayət edib.
2023-cü il fevralın 26-da Ali Məhkəmənin jurnalistin işə bərpası və ona təzminat ödənməsi barədə qərarı ləğv etdiyi bəlli olub. Bakıda yaşayan Aygün Əliyeva fevralın 27-si evdə çoxlu həb içərək zəhərlənib, Kliniki Tibbi Mərkəzə yerləşdirilib. AZƏRTAC-ın həmin gün yaydığı açıqlamada qeyd olunub ki, Aygün Əliyevaya barışıq, işdən çıxarılma əmrinin ləğvi və işə götürülməsi təklif olunub, ancaq o, məhkəmə prosesinin davam etdirilməsində maraqlı olduğunu bildirib.
