Söyüdlü: araşdırmalar davam edir
Gədəbəyin Söyüdlü kəndində araşdırmalar aparan hökumət komissiyasından məlumat var.
Bir qrup Söyüdlü sakini iyunun 20-də aksiya keçirib, ərazidəki qızıl mədəninin tullantılarının ekologiyaya mənfi təsir göstərdiyini vurğulayıb. Polis aksiyanı dağıdıb. Xəsarət alanlar, tutulanlar var.
Bu olay ölkədə böyük əks-səda doğurub. İyunun 21-də baş nazir Əli Əsədov Söyüdlüdəki tullantıxana (süni göl) sahəsində monitorinq aparmağa və vəziyyəti qiymətləndirməyə məsul komissiya yaradıb. Ekologiya və təbii sərvətlər naziri Muxtar Babayevin sədr təyin edildiyi komissiyaya səhiyyə nazirinin müavini, fövqəladə hallar nazirinin müavini, kənd təsərrüfatı nazirinin müavini, Nazirlər Kabineti Aparatının sənaye və energetika şöbəsinin müdiri, İqtisadiyyat Nazirliyi yanında Əmlak Məsələləri Dövlət Xidmətinin rəisi və Gədəbəy Rayon İcra Hakimiyyətinin başçısı daxildir.
AZƏRTAC-ın 24 iyun məlumatına görə, aidiyyəti qurumlar kənddə ətraf mühitə təsirləri qiymətləndirir, xəstəliklərin statistikası və dinamikasını təhlil edir, tibbi müayinələr keçirir, pay torpaqlarında və örüş sahələrində məhsuldarlığa, mal-qaraya neqativ təsirləri öyrənir, su və torpaq nümunələri götürərək analizlər aparır, atmosfer havasının keyfiyyətini yoxlayır.
Aparılan kompleks monitorinqlərin nəticələrinin təhlil olunacağı, təkliflərin hazırlanaraq Nazirlər Kabinetinə təqdim ediləcəyi bildirilir.
Söyüdlüdəki qızıl yatağını Böyük Britaniyada qeydiyyatdan keçmiş “Anqlo-Asian Mining” şirkəti istismar edir. Şirkətin əsas payçısı iranlı ABŞ vətəndaşı Rza Vəziriyə məxsus “R.V.İnvestment Group Services, LL USA” şirkətidir.
Yatağın kəşfiyyatı, işlənməsi və hasilatın pay bölgüsü haqqında saziş 1997-ci ildə imzalanıb, 2022-ci ildə yenilənib.
Gədəbəy: Söyüdlü əhli bu dəfə şəhərdə toplaşıb
Baş nazir Söyüdlü komissiyası yaratdı
