Qadın-kişi bərabərsizliyi nə vaxt aradan qalxa bilər? – CNN
ABŞ-ın CNN kanalı Dünya İqtisadi Forumunun gender bərabərliyi hesabatını şərh edib.
Dünya İqtisadi Forumunun gender bərabərliyi reytinqinə 14 ildir İslandiya başçılıq edir. 2023-cü ilin reytinqində ikinci yeri Norveç, üçüncü yeri Finlandiya tutur. 146 ölkənin yer aldığı siyahını Əfqanıstan qapayır. Azərbaycan 97-ci yerdədir.
Novator.az-ın məlumatına görə, CNN kanalı hesabata əsaslanaraq dünyanın gender bərabərliyinə 2154-cü ildən tez çatmayacağını vurğulayır: “Qlobal miqyasda qadınlarla kişilər arasında bərabərsizlik olsa-olsa 131 ilə aradan qalxa bilər”.
Hesabata əsasən, 2023-cü ildə dünyada kişilərlə qadınlar arasında bərabərsizlik 2022-ci ilə nisbətdə vur-tut 0,3 faiz azalıb.
Dünya İqtisadi Forumunun icraçı direktoru Sədiyə Zahidinin sözlərinə görə, son illər dünyada gender bərabərliyinə nail olunması baxımından ya ləngimə, ya da geriləmə baş verib: “Koronavirus pandemiyasının xüsusilə təhsil sektorunda, əmək bazarında qadınlara vurduğu ziyan, pandemiyanın doğurduğu iqtisadi, siyasi böhran gender bərabərliyi istiqamətində əvvəllər əldə olunmuş nailiyyətləri zəiflədib. Hazırda dünyanın bəzi ölkələrində nailiyyətlərə qismən qayıdış nəzərə çarpsa da, çox yerdə hələ də bir yeni böhran meydana çıxan kimi qadın-kişi bərabərliyi pozulur, gender sahəsində geriləmə müşahidə olunur”.
Dünya İqtisadi Forumu qlobal gender bərabərliyi indeksini 2006-cı ildən tərtib edir. Reytinq dörd meyarla – kişilərin və qadınların iqtisadiyyatda rolu, təhsilə əlçatanlığı, siyasətə cəlb olunması və sağlamlıq səviyyəsi ilə ölçülür.
2006-cı ildən dünyada bu dörd meyarın əhatə etdiyi sahələrdə gender fərqi yalnız 4,1 faiz azalıb.
2023-cü il hesabatında vurğulanır ki, 146 ölkədə təhsil, siyasət, sağlamlıq meyarları üzrə cüzi irəliləyiş baş versə də, iqtisadi meyarda geriləmə qeydə alınıb: “Pandemiyadan və onunla əlaqəli böhranlardan sonra bərpa prosesi – gender bərabərliyinə qayıdış zəif gedir. O biri yandan qlobal iqlim dəyişkənliyi və texnoloji tərəqqi faktorlarının qadınların iqtisadi hüquq və imkanlarını daha da daraldacağı təhlükəsi yaranıb. Milyonlarla qadın iqtisadi fəaliyyət imkanından məhrum olmaqdadır. Bu, qlobal iqtisadiyyatın taleyi sarıdan da ciddi narahatlıq doğurur”.
Mənbə: CNN.com
