“Dərman vasitələri haqqında” qanun yenilənir
Milli Məclisin 23 iyun iclasında “Dərman vasitələri haqqında” qanunda dəyişikliklər layihəsi ilk oxunuşdan keçib.
Novator.az bildirir ki, qanun ölkədə dövlət qeydiyyatına alınmış dərman vasitələri, dərman maddələri və tibb vasitələri barədə məlumatlardan ibarət informasiya sistemi qurulmasını nəzərdə tutur, bir çox anlayış, o cümlədən dərman vasitəsinin dövlət qeydiyyatı, resept anlayışları yeni redaksiyada verilir.
Əsas yeniliklərdən biri dərman vasitələrinin idxalını sərtləşdirir. Reseptə yazılan, dövlət reyestrinə daxil edilməyən dərman vasitələrini pasiyentin sifarişi əsasında topdansatış əczaçılıq müəssisələri, aptek təşkilatları və ya icra hakimiyyəti orqanının müəyyən etdiyi orqan (qurum) yalnız reseptdə yazılan miqdarda ölkəyə gətirə bilərlər. Həmin dərman vasitələrinin resept yazılan şəxs istisna olmaqla ölkə ərazisində satışı qadağandır.
Qanunun 2023-cü il noyabrın 1-dən qismən, 2024-cü il yanvarın 1-dən tam qüvvəyə minməsi planlaşdırılır.
2015-ci il sentyabrın 15-dən dərman vasitələrinin təsdiqlənən qiymətlərlə satışına başlanıb. Topdan və pərakəndə satış qiymətləri tənzimlənmiş dərman vasitələrinin fərqli qiymətlərlə satışı qadağandır. Qiymətləri Tarif (qiymət) Şurası (iqtisadiyyat nazirinin sədrlik etdiyi, dövlət tənzimlənməsi tətbiq edilən qiymətlərə (tariflərə) və xidmət haqlarına məsul orqan) təsdiqləyir.
