Söyüdlü aksiyası
Gədəbəyin Söyüdlü kəndinin bir qrup sakini iyunun 20-də aksiya keçirib. “Turan”ın məlumatına görə, onlar kənddəki qızıl mədəninə bağlı ikinci süni gölün yaradılmasına etiraz edib. Sakinlər bildirir ki, filizin kimyəvi təmizlənməsindən yaranan çirkabla dolu ilk göl ərazinin ekologiyasına mənfi təsir göstərib, ikinci göl isə örüş sahələrində yaradılır.
Polis əməkdaşları aksiyanı dağıdarkən dəyənəkdən və gözyaşardıcı qazdan istifadə edib. 10 nəfərin xəsarət aldığı, 6 nəfərin tutulduğu xəbər verilir.
Daxili İşlər Nazirliyi bəyan edib ki, bəzi şəxslər polisin qanuni tələblərinə qəsdən tabe olmayaraq süni gölün inşasında çalışanlara daşla, küt alətlərlə xəsarət yetirib və polis əməkdaşlarına müqavimət göstərməyə cəhd ediblər.
“Turan”ın iyunun 21-də yerli sakinlərdən aldığı məlumata görə, 5 aksiyaçıya 20 sutkalıq inzibati həbs cəzası verilib, 1 nəfər 1500 manat cərimələnib.
Novator.az müxalif siyasətçilərin “Facebook” şəbəkəsində yaydığı rəylərə də nəzər salıb.
Müsavat Partiyasının başqanı Arif Hacılı dinc aksiyaçılara, o cümlədən qadınlara qarşı gözyaşardıcı qazdan istifadə olunmasını “əndazəni aşan vəhşilik” adlandırıb: “Bu hadisəni törədənlər cəzalandırılmalıdır”.
Azərbaycan Xalq Partiyasının sədri Pənah Hüseyn qeyd edib ki, ekoloji təhdidə, fəlakətə, süni zəhərli göl yaradılmasına etiraz edən sakinlər yox, müasir filtrasiya qurğularına vəsait ayırmayıb təbiəti zəhərləyənlər cəzalandırılmalıdır.
AXCP sədri Əli Kərimli yazır ki, Söyüdlü camaatı qızıl mədənlərinin zəhərli tullantılarının Gədəbəyin təbiətinin cəhənnəmə çevrilməsinə etiraz edib, rejim isə onlarla “xalq düşmənləri” kimi davranıb.
Azərbaycan Demokratiya və Rifah Partiyasının sədri Qubad İbadoğlu Söyüdlü hadisəsinə belə münasibət bildirib: “Xalqla zor gücü ilə danışan istənilən hakimiyyət sonda qalib deyil, məğlub olur!”
