Gədəbəy: Söyüdlü əhli bu dəfə şəhərdə toplaşıb
Gədəbəyin Söyüdlü kəndinin sakinləri iyunun 21-i rayon mərkəzində yürüş keçiriblər. Rayon polis şöbəsinin qarşısına toplaşan sakinlər iyunun 20-si kənddə keçirilmiş aksiyanın güc tətbiqi ilə dağıdılmasını pisləyib, tutulanların buraxılmasını tələb edib.
Bir qrup söyüdlülü iyunun 20-si kənddə aksiya keçirib, ərazidəki qızıl mədəninə bağlı ikinci süni gölün yaradılmasına etiraz edib. Sakinlər bildirib ki, filizin kimyəvi təmizlənməsindən yaranan çirkabla dolu ilk göl ərazinin ekologiyasına mənfi təsir göstərib, ikinci göl isə örüş sahələrində yaradılır.
Polis əməkdaşları aksiyanı dağıdarkən dəyənəkdən və gözyaşardıcı qazdan istifadə edib. 10 nəfər xəsarət alıb, tutulan 5 aksiyaçıya 20 sutkalıq inzibati həbs cəzası verilib, 1 nəfər 1500 manat cərimələnib.
“Turan”ın məlumatına görə, 21 iyun aksiyaçılarının qarşısına çıxan Gədəbəy Rayon İcra Hakimiyyətinin başçısı Orxan Mürsəlov deyib ki, qızıl mədəninə bağlı göl 11 il əvvəl salınıb, bu vaxta qədər sakinlərin hər hansı narazılığı olmayıb, ikinci gölün yaradılması isə nəzərdə tutulmur. O, gölün Söyüdlüdə ekologiyaya ziyan vurduğu təsdiqlənəcəyi halda tədbirlər görüləcəyini əlavə edib.
