Baş nazir Söyüdlü komissiyası yaratdı
İyunun 21-də baş nazir Əli Əsədov Gədəbəy rayonunun Söyüdlü kəndindəki tullantıxana sahəsində monitorinq aparmağa və vəziyyəti qiymətləndirməyə məsul komissiya yaradıb. Ekologiya və təbii sərvətlər naziri Muxtar Babayevin sədr təyin edildiyi komissiyaya səhiyyə nazirinin müavini, fövqəladə hallar nazirinin müavini, kənd təsərrüfatı nazirinin müavini, Nazirlər Kabineti Aparatının sənaye və energetika şöbəsinin müdiri, İqtisadiyyat Nazirliyi yanında Əmlak Məsələləri Dövlət Xidmətinin rəisi və Gədəbəy Rayon İcra Hakimiyyətinin başçısı daxildir.
Komissiyaya sakinlərin sağlamlığının və ətraf mühitin qorunması sahəsində müraciətlərin araşdırılmasını təmin etmək, monitorinqin və qiymətləndirmənin nəticələrinə uyğun olaraq təkliflər hazırlamaq tapşırılıb.
Söyüdlü kəndinin sakinləri iyunun 20-də aksiya keçirib, ərazidəki qızıl mədəninə bağlı yeni süni gölün yaradılmasına etiraz edib. Sakinlər bildirib ki, 11 il əvvəl salınmış, filizin kimyəvi təmizlənməsindən yaranan çirkabla dolu göl ərazinin ekologiyasına mənfi təsir göstərib, yeni göl isə örüş sahələrində yaradılır.
Polis əməkdaşları aksiyanı dağıdıb, 10 nəfər xəsarət alıb, tutulan 5 aksiyaçıya 20 sutkalıq inzibati həbs cəzası verilib, 1 nəfər 1500 manat cərimələnib.
İyunun 21-də Söyüdlü sakinləri ilə görüşən Gədəbəy Rayon İcra Hakimiyyətinin başçısı Orxan Mürsəlov deyib ki, kənddə ikinci gölün yaradılması nəzərdə tutulmur.
