Gerçək mənzərə üçün gerçək statistika
Dövlət Statistika Komitəsinin 2022-ci ilin əvvəlinə olan hesabatında Azərbaycan əhalisinin 4,4 faizi 70 və daha yuxarı yaşlı, 3,4 faizi 65-69 yaşlı, 5,7 faizi 60-64 yaşlı şəxslər kimi göstərilib.
Özəl hesablama aparan vətəndaş cəmiyyəti eksperti Rövşən Ağayev yazır ki, bölgələrdə demoqrafik qocalmanın miqyası çox fərqlidir: “Pensiya yaşından yuxarı əhalinin ümumi əhaliyə nisbəti Yardımlıda 6,5 faiz, Cəlilabad və Saatlıda 7 faiz, Biləsuvarda 7,5 faiz, Gədəbəy, Qax, Qazax, Zaqatalada 11-11,5 faizdir. Bu iki qrup bölgə arasında az qala yarıbayarı fərq var. Mütləq rəqəmlərə baxanda 57 min nəfər əhalisi olan Qaxda pensiya yaşından yuxarı 7 min nəfər, 111 min nəfər əhalisi olan Saatlıda 7,8 min nəfər qeydə alınıb”.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Novator.az-ın məlumatına görə, Rövşən Ağayev qeyd edir ki, bölgələrin sağlamlıq və orta yaş xəritəsinin hazırlanması son dərəcə vacibdir: “Ancaq rəsmi statistika reallıqları gizlətmək üçün siyasətin ayaqları altına atılıb və bölgələrlə bağlı ən sadə bilgiləri belə əldə etmək mümkün deyil. Hətta əhalinin sayını da dəqiq bilmək üçün min cür dolayı üsula əl atmağa məcbur qalırsan”.
