İşsizlik statistikasına diqqət
Rəsmi hesabata görə, Dövlət Məşğulluq Agentliyi 2023-cü il iyunun 1-nə 250 min 138 nəfəri işsiz kimi qeydiyyata alıb, onların 2459-na işsizlikdən sığorta ödənişi verilib.
“İşsizlikdən sığorta haqqında” qanuna görə, əmək münasibətlərinə əmək müqaviləsinin müddətinin bitməsi əsasları ilə xitam verilmiş şəxslərə ödəniş üçün onların müddətli əmək müqaviləsi üzrə ən azı 2 il 6 ay fasiləsiz iş stajı olmalıdır. Sığorta ödənişi minimum əməkhaqqı qədər ödənir.
Dövlət orqanı və ya hüquqi şəxs ləğvi edildikdə, işçilərin və ya dövlət qulluqçularının sayı və ya ştatları ixtisar edildikdə işsizlikdən sığorta ödənişi üçün azı 1 il sığorta stajı tələb olunur və ödəniş işçinin itirilmiş orta aylıq əməkhaqqının 50 faizi məbləğində hesablanır.
Novator.az-ın məlumatına görə, statistikaya diqqət yönəldən iqtisadçı alım, siyasətçi Qubad İbadoğlu yazır ki, işsizlərin rəsmi sayı 2020-ci ilin aprel ayından sonra ilk dəfə açıqlanır. O həmçinin qeyd edir ki, 2019-cu il iyunun 1-nə məşğulluq xidməti orqanları 50,4 min nəfəri işsiz kimi qeydə almışdı və son dörd ildə rəsmi işsizlərin sayı 4,9 dəfədən çox artıb.
MDB Statistika Komitəsinin hesabatına əsaslanan Qubad İbadoğlu bildirir ki, bu il iyunun 1-nə Qazaxıstanda 148,2 min nəfər, Moldovada 105,7 min nəfər, Qırğızıstanda 96,2 min nəfər, Tacikistanda 88,7 min nəfər, Ermənistanda 83,5 min nəfər, Belarusda 80,6 min nəfər, Rusiyada 76,45 min nəfər işsiz rəsmiləşib.
