Ekspertdən bina replikası
İyunun 6-sı Bakının Xətai rayonunda Kənd Təsərrüfatı Nazirliyinin yeni inzibati binası istifadəyə verilib. 500-ə yaxın şəxsin fəaliyyəti üçün nəzərdə tutulan binada 215 otaq, Elektron İdarəetmə Mərkəzi üçün xüsusi otaq, konfrans və iclas zalları var.
Vətəndaş cəmiyyəti eksperti, iqtisadçı Samir Əliyev özünün “Facebook” səhifəsində Niderlandın kənd təsərrüfatına məsul nazirliyinin inzibati binasının fotosunu yerləşdirərək yazır: “Niderlandın ümumi daxili məhsulu 1 trilyon dollardan çox, dövlət büdcəsi gəlirləri yarım trilyon dollara yaxındır. Azərbaycan ümumi daxili məhsulun həcmində Niderlanddan 13 dəfə, dövlət büdcəsi gəlirləri baxımından 21 dəfə geri qalır. Niderland hər il Azərbaycanın ümumi daxili məhsulundan iki dəfə çox kənd təsərrüfatı məhsulu ixrac edir.
İldə 100 milyard dollarlıq kənd təsərrüfatı məhsulu ixrac edən ölkənin kənd təsərrüfatına məsul nazirliyinin inzibati binasına da baxın, ondan 112 dəfə az kənd təsərrüfatı məhsulu ixrac edən Azərbaycanın Kənd Təsərrüfatı Nazirliyinin inzibati binasına da. Dövlət büdcəsi vəsaitlərinin nə dərəcədə səmərəsiz xərcləndiyi yaxşı görünür”.
