Tikinti sahəsində yeniliklər parlamentdən keçdi
Parlamentin 30 may iclasında Şəhərsalma və Tikinti Məcəlləsinə dəyişikliklər son oxunuşda qəbul edilib. Novator.az bildirir ki, layihəyə görə, tikinti işlərinin dayandırılması barədə qərar qəbul edildiyi gündən 6 ay ərzində tikintiyə icazə alınmadıqda; tikinti işlərinin dayandırılması barədə qərarda nəzərdə tutulan pozuntular 1 il ərzində aradan qaldırılmadıqda tikintisi başa çatmış və ya çatmamış tikinti obyekti və ya onun hissəsi sökülür.
İnzibati Xətalar Məcəlləsinə icazə alınmadan tikinti obyektlərinin inşa edilməsi üzrə yeni cərimələr, Cinayət Məcəlləsinə özbaşına bina və qurğular tikmə, mövcud tikililərin konstruksiyasında qanunsuz dəyişiklik etmə üzrə yeni cəzalar əlavə olunur.
“Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanuna son oxunuşdan keçmiş layihəyə görə, tikintisi Şəhərsalma və Tikinti Məcəlləsinin tələblərinə uyğun aparılmamış, 2023-cü il mayın 1-dək inşa edilmiş, lakin etibarlılıq və təhlükəsizlik tələblərinə uyğunluğuna dair rəyi təqdim edilmiş tikinti obyektlərinin istismarına icazə verilir.
