Azərbaycan təhsili beynəlxalq test güzgüsündə
Vətəndaş cəmiyyəti eksperti Rövşən Ağayev PİRLS beynəlxalq testinin 2021-ci il üzrə nəticələrinə nəzər salıb. Novator.az-ın məlumatına görə, o yazır ki, ibtidai təhsil pilləsini bitirən şagirdlərin oxuma və oxuyub anlama bacarıqlarını ölçən test 601-700 balı ən yüksək, 501-600 balı yüksək, 500 balı orta, 475-499 balı aralıq, 400-474 balı aşağı göstərici kimi qəbul edib: “Azərbaycanlı şagirdlər 440 bal nəticə göstərib. 2011-ci ildə nəticə 462 bal, 2016-cı ildə 472 bal olmuşdu”.
Ekspert qeyd edir ki, PİRLS şagirdləri sosial-iqtisadi statusuna görə üç qrupa bölür – yüksək, orta və aşağı: “Yüksək status dedikdə valideynlərin birinin universitet, digərinin peşə təhsilinə malik olması, evlərində 25-dən artıq kitabın və uşaqlarla bağlı 25-dən artıq kitabın olması nəzərdə tutulur.
Aşağı statusda valideynlərin hər ikisinin ya yalnız orta təhsili var, ya da onlar ümumiyyətlə təhsilsizdir, evlərində hər iki kateqoriya üzrə kitab sayı 25-dən azdır.
Orta statusa bu iki qrupa aid olmayanlar aid edilir.
2021-ci ildə Azərbaycanı qiymətləndirmədə təmsil etmiş şagirdlərin 8 faizinin yüksək, 44 faizinin aşağı sosial-iqtisadi statusa malik olduğu görünür. Təsnifatda ilk sıranı tutan Norveçdə 57 faiz yüksək, 6 faiz aşağı statuslu şagirdlər olub.
Sosial-iqtisadi status şagirdlərin topladığı ballarda da özünü göstərir. Yüksək qrupda olan azərbaycanlı şagirdlərin orta balı 486, aşağı qrupda olanların orta balı 419-dur”.
