Əməyin Mühafizəsi Mərkəzi yaradılır
Əmək və Əhalinin Sosial Müdafiəsi Nazirliyi yeni prezident tapşırığı alıb. Mayın 23-də imzalanan fərmana görə, nazirlik iki ay müddətində Dövlət Əmək Müfəttişliyi Xidmətinin tabeliyində Əməyin Mühafizəsi Mərkəzi publik hüquqi şəxsi yaratmalıdır.
Mərkəz işəgötürənlərə əməyin mühafizəsi və iş yerlərinin attestasiyası sahələrində xidmətlər göstərən, eləcə də bu sahələrdə təlimlər keçirilməsini, məsləhət verilməsini və metodiki dəstəyi təmin edir.
Başqa bir fərmanla ictimai və sosial məqsədlər üçün yaradılmış fondların siyahısı təsdiqlənib: Heydər Əliyev Fondu, Qarabağ Dirçəliş Fondu, Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu (“YAŞAT” Fondu).
