Üç ayda pensiyaçılar 12,3 min nəfər azalıb
Rəsmi hesabata görə, 2023-cü il aprelin 1-nə Dövlət Sosial Müdafiə Fondunda 1 milyon 101,9 min nəfər pensiyaçı qeydiyyatda olub.
Pensiyaların orta məbləği 432,3 manat göstərilir.
Novator.az bildirir ki, yanvarın 1-nə 1 milyon 114,2 min nəfər pensiyaçı vardı. Üç ayda pensiyaçıların sayı 12,3 min nəfər azalıb.
Minimum pensiya 280 manatdır.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
Azərbaycanda bütün pensiyalar muzdlu işçilərin orta aylıq nominal əməkhaqqının illik artım tempinə uyğun indeksləşdirilir. 2023-cü ilin ilk rübündə orta maaş ötən ilin eyni dövrünə nisbətən 11,4 faiz artıb.
