Əfv sərəncamı
Prezident İlham Əliyev mayın 8-də əfv sərəncamı imzalayıb. Sərəncam azadlıqdan məhrum edilmiş 463 nəfərin cəzanın çəkilməmiş hissəsindən azad olunmasını, 220 nəfərin cəzasının çəkilməmiş hissəsinin yarıyadək azaldılmasını nəzərdə tutur.
Azadlıqdan məhrumetmə cəzasına şərti məhkum edilmiş 2 nəfər, azadlıqdan məhrumetmə cəzasına məhkum edilmiş və cəzasının çəkilməsi təxirə salınmış 3 nəfər cəzadan, azadlığın məhdudlaşdırılması cəzasına məhkum edilmiş 18 nəfər cəzanın çəkilməmiş hissəsindən qurtulur.
Azadlığın məhdudlaşdırılması cəzasına məhkum edilmiş 5 nəfərin cəzasının çəkilməmiş hissəsi yarıyadək azaldılır.
İslah işləri cəzasına məhkum edilmiş 2 nəfər, cərimə cəzasına məhkum edilmiş 88 nəfər cəzadan azad olunur.
Prezidentin mətbuat xidmətinin məlumatına görə, hüquq müdafiə təşkilatlarının müraciətləri əsasında 10 məhkum azadlığa buraxılır: siyasətçi Əli Əliyev, hüquq müdafiəçisi Elçin Məmməd, “Tərtər işi” üzrə 5 nəfər, “Gəncə işi” üzrə 3 nəfər.
2017-ci ildə əsasən Tərtər istiqamətində bir qrup hərbi qulluqçu və mülki şəxs düşmən kəşfiyyatı ilə məxfi əməkdaşlıq ittihamı ilə tutulub.
Bir qrup şəxs 2018-ci ildə Gəncənin icra başçısına qəsdə, şəhərdə iki polis zabitinin həlak olmasına gətirən hadisələrə görə həbs edilib.
