Pensiya yaşını endirməli
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu rəsmi demoqrafik göstəricilərə nəzər salıb. Novator.az-ın məlumatına görə, o yazır ki, Dövlət Statistika Komitəsi gözlənən ömür uzunluğunu 1970-1971-ci illər təvəllüdlü kişilər üçün 66,8 yaş, qadınlar üçün 74,3 yaş, 1975-1976-cı illər təvəllüdlü kişilər üçün 65,2 yaş, qadınlar üçün 72,8 yaş, 1980-1981-ci illər təvəllüdlü kişilər üçün 64,5 yaş, qadınlar üçün 72,2 yaş göstərir: “Göründüyü kimi, Azərbaycanda gözlənən ömür uzunluğu azalmağa üz tutur. Bu gedişlə 2035-ci ildə pensiya çıxan 1970-ci il təvəllüdlü kişilər orta hesabla 2,8 il, 2040-cı ildə pensiya çıxan 1975-ci il təvəllüdlü kişilər orta hesabla 2 ay pensiya ala biləcək.
1980-ci il təvəllüdlü kişilər üçün gözlənən ömür uzunluğu orta hesabla 64,5 yaş olduğuna görə onlar pensiya yaşına qədər yaşaya bilməyəcəklər. Odur ki, pensiya yaşını qaldırmaq yox, endirmək lazımdır”.
2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin gündən yaş həddinin artımına başlanıb. İndi kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
