Sosial müavinət qanunu yenilənir
Milli Məclisin 2 may iclasında “Sosial müavinətlər haqqında” qanuna əlavələr ilk oxunuşdan keçib. Layihə himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə aylıq müavinət təsisini nəzərdə tutur.
Başqa bir təklifə əsasən, himayədar ailəyə verilmiş uşaqlara mövsümi geyim alınması üçün ildə 4 dəfə (mart, iyun, sentyabr və dekabr aylarında) birdəfəlik müavinət ödənməlidir.
Yeniliklər 2023-cü il yanvarın 1-dən tətbiq olunacaq.
Novator.az bildirir ki, hazırda bu aylıq müavinətlər var: dövlət qulluqçularına ömürlük müavinət; yaşa görə müavinət; əlilliyə görə müavinət; ailə başçısını itirməyə görə müavinət; bəzi kateqoriya şəxslərə kommunal, nəqliyyat və digər xidmətlərə görə müavinət; 3 yaşınadək uşağa qulluğa görə müavinət; müddətli həqiqi hərbi xidmət hərbi qulluqçularının uşaqlarına müavinət; valideynlərini itirmiş və valideyn himayəsindən məhrum olmuş uşaqların qəyyumlarına (himayəçilərinə) müavinət; 1 yaşınadək uşağı olan aztəminatlı ailələrə müavinət; vəfat etmiş keçmiş prezidentin arvadına (ərinə) və ya öhdəsində olan uşağına ödənən müavinət; beşdən çox uşağı olan qadınlara müavinət; övladlığa götürülən uşağa, o cümlədən 18 yaşınadək əlilliyi müəyyən edilmiş uşağa görə müavinət.
Birdəfəlik müavinətlər belə sıralanır: radiasiya qəzası nəticəsində zərər çəkmiş şəxslərə hər il müalicə üçün müavinət; uşağın anadan olmasına görə müavinət; dəfn üçün müavinət; Azərbaycan Respublikasının işğaldan azad edilmiş ərazilərində işləyən mütəxəssisə ilkin maddi-məişət şəraitinin dəstəklənməsi üçün müavinət.
