Qapı niyə bağlıdır?
Aprelin 19-da Nazirlər Kabineti koronavirus infeksiyası üzrə xüsusi karantin rejiminin müddətini iyulun 1-dək uzadıb. Rejimin mayın 1-də başa çatması nəzərdə tutulmuşdu.
2020-ci il martın 31-dən hökm sürən xüsusi karantin rejimi hazırda ölkəyə giriş-çıxışa məhdudiyyət qoyur – quru sərhədlər bağlıdır.
Novator.az-ın məlumatına görə, Müsavat Partiyasının başqanı Arif Hacılı yazır ki, quru sərhədlərin bağlı saxlanmasının koronavirus və təhlükəsizliklə heç bir əlaqəsi yoxdur: “Quru sərhədlər aviaşirkətlərin, xarici ticarətlə məşğul olan vəzifəli oliqarxların monopolist maraqları, onların daha da varlanması naminə bağlı saxlanır. Hakim zümrə üçün həmişə açıq olan quru sərhədlərdən hər gün yüzlərlə, bəlkə də minlərlə maşın keçir. Bütün qapılar kimi quru sərhədlərin qapıları da yalnız zillət içində yaşamağa məhkum edilən xalqın üzünə bağlıdır”.
