Milli Şuranın Zamin Salayevə müraciəti
Demokratik Qüvvələrin Milli Şurasının Koordinasiya Mərkəzi məhbus AXCP fəalı Zamin Salayevə müraciət edərək aclıq aksiyasını dayandırmasını istəyib. Novator.az-ın məlumatına görə, müraciətdə qeyd olunur ki, hakimiyyətin susqunluğu ilə Zamin Salayev ölümə sürüklənir, bu qəddarlıq ikrah hissi yaradır: “Zamin bəy, sən də inadına yaşa. Dayandır aclıq aksiyasını. Sənin azadlıq naminə ölümü gözə aldığını hamımız gördük. Sən artıq qalibsən. Sarsılmaz, dəmir iradənlə qalibsən. Artıq yetər, dayandır aclığı. Ölümünlə səni sevənləri məyus etmə, zalımları sevindirmə. Sən zatən azad insansan. Sən yaşamalısan!”
2013-cü ildə yaradılmış Demokratik Qüvvələrin Milli Şurasına tarixçi alim Cəmil Həsənli sədrlik edir. Qurumun Koordinasiya Mərkəzində AXCP sədri Əli Kərimli, Müsavat Partiyasının üzvü Tofiq Yaqublu, sabiq deputat Gültəkin Hacıbəyli və başqa müxaliflər təmsil olunur.
Bakı İstintaq Təcridxanasında saxlanan Zamin Salayev AXCP Salyan şöbəsinin sədridir. O, fevralın 7-si Bakıda tutulub, silah tətbiq etməklə xuliqanlıqda təqsirli bilinir. Rəsmi iddiaya görə, cəbhəçi həmin gün paytaxt sakini Natiq Süleymanova bıçaqla xəsarət yetirib. İstintaqı Qaradağ Rayon Polis İdarəsi aparıb.
Fevralın 8-də Qaradağ Rayon Məhkəməsi Zamin Salayev barəsində 3 aylıq həbs qətimkan tədbiri seçib.
Zamin Salayev ittihamı qəbul etmir, tutulduğu gündən aclıq aksiyası keçirir. Aclıq müddətində cəbhəçinin 38 kiloqram çəki itirdiyi, orqanizmində ciddi problemlər yarandığı bildirilir. Təkidli xahişlərə baxmayaraq cəbhəçi aclığı dayandırmır.
Zamin Salayev 2020-ci il aprelin 20-dən 2022-ci il yanvarın 19-dək ağır cinayətdə ittiham etməklə böhtan və təhqir ittihamı ilə həbsdə yatıb, siyasi məhbus sayılıb. Həmin həbsdən bir müddət öncə Zamin Salayev sosial şəbəkədə video yayaraq Salyan Rayon Polis İdarəsinin bölmə rəisi, polis kapitanı Həmzə Əzizovu bir qadına münasibətdə qanunazidd hərəkətlərdə günahlandırıb. Bundan sonra Həmzə Əzizov Salyan Rayon Məhkəməsində xüsusi ittiham qaydasında iddia qaldıraraq Zamin Salayevin cinayət məsuliyyətinə cəlb olunmasını istəyib.
AXCP sədri Zamin Salayevdən yazıb
Zamin Salayev: məhkəmə qərar verdi
Zamin Salayev qərarından dönmür
Zamin Salayev 8 kiloqram arıqlayıb
Əli Kərimli: “Biganə qalmamalıyıq”
Zamin Salayev oğluna nədən gileylənib?
Əli Kərimli Zamin Salayevə müraciət edib
Vəkil Zamin Salayevə baş çəkib
“Bu zorakılıq dövlətimizi hörmətdən salır”
Zamin Salayev qərarından şikayət verilib
