Nəqliyyat sektorunda yeni qurumlar
Prezident İlham Əliyev nəqliyyat sənədləri imzalayıb. Aprelin 19-da verilən fərmanla Bakı şəhərinin inzibati ərazisində yol hərəkətinin təşkilində iştirak, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində tənzimləmə və nəzarət Rəqəmsal İnkişaf və Nəqliyyat Nazirliyinə həvalə edilir.
Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyi Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyinin ona qoşulması formasında yenidən təşkil olunur.
Həmin gün imzalanan sərəncam isə nəqliyyatın ayrı-ayrı növlərinin koordinasiyalı fəaliyyətinin və əhalinin mobilliyinin təmin edilməsi, yol və nəqliyyat infrastrukturunun inkişafı, yol hərəkətinin təşkili, təhlükəsizliyi və tənzimlənməsi sahələrində fəaliyyətin əlaqələndirilməsi və təkmilləşdirilməsi məqsədilə bu tərkibdə Nəqliyyatı Əlaqələndirmə Şurasının yaradılmasını nəzərdə tutur: sədr – rəqəmsal inkişaf və nəqliyyat naziri, üzvlər – Nazirlər Kabineti Aparatının nəqliyyat, kommunikasiya və innovasiya şöbəsinin müdiri, daxili işlər nazirinin müavini, ekologiya və təbii sərvətlər nazirinin müavini, Dövlət Şəhərsalma və Arxitektura Komitəsi sədrinin müavini, Bakı Şəhər İcra Hakimiyyəti başçısının müavini, Azərbaycan Avtomobil Yolları Dövlət Agentliyi İdarə Heyəti sədrinin müavini, Azərbaycan Yerüstü Nəqliyyat Agentliyi İdarə Heyətinin sədri, “Azərbaycan Dəmir Yolları” Qapalı Səhmdar Cəmiyyətinin sədri, “Bakı Metropoliteni” Qapalı Səhmdar Cəmiyyətinin sədri.
Nazirlər Kabinetinə bir ay müddətində şuranın əsasnamə layihəsi ilə bağlı təkliflər hazırlamaq tapşırılıb.
