Bahalıq əmanəti yeyir
İqtisadçı Rövşən Ağayev inflyasiya göstəricilərini əmanət faizləri ilə tutuşdurub. Novator.az-ın məlumatına görə, ekspert yazır ki, rəsmi statistika 2021-2022-ci illərdə inflyasiyanı 13-14 faiz göstərib: “Əmanət faizləri inflyasiya göstəricisindən nə qədər aşağıdırsa, bu maliyyə yatırımı formasındakı sərvət də o qədər dəyərsizləşir. Son iki ildə manatla depozitlərin illik faizi 9 faiz ətrafında olub. Bu faizlərlə inflyasiya göstəricisi arasında fərq təxminən 4-5 faizdir.
Valyuta ilə depozitlərdə məsələ daha qəlizdir. Azərbaycanda əhali yığımlarında ABŞ dollarına üstünlük verir. Manat-dollar məzənnəsi beş ildir dəyişmədiyi üçün valyuta depozitlərinin manat ifadəsində məbləği də sabit qalır. Amma dollarla depozit faizləri çox aşağıdır – orta hesabla 1-1,5 faiz. Bu halda inflyasiya göstəricisi ilə depozit faizi arasında fərq 12-12,5 faiz olur. Yəni 10000 dollarlıq depozitin müqabilində ildə 150 dollar faiz gəliri əldə etdiyiniz halda sərvətiniz 1000 dollar dəyərsizləşir.
Ölkədə maliyyə bazarları inkişaf etmədiyi üçün vətəndaş üçün alternativ yatırım alətləri yoxdur – əmanət tək ünvan olur. Əmlak bazarı isə qiymətlərin çox yüksəkliyi, eləcə də ləng bazar olduğu üçün xüsusən kiçik əmanət sahibləri üçün cəlbedici deyil.
Çox anormal situasiyadır – vətəndaşın sərvətinin dəyərsizləşməsi kiçik qrup bankların timsalında zənginlərin zənginləşməsi ilə paralel gedir”.
