Qapalı sərhədin örtülü işləri
2020-ci il martın 31-dən koronavirus infeksiyasına görə tətbiq olunan xüsusi karantin rejimi Azərbaycana giriş-çıxışa məhdudiyyət qoyur – quru sərhədlər bağlıdır. İqtisadçı, Respublikaçı Alternativ Partiyasının funksioneri Natiq Cəfərli rəsmi statistikaya əsaslanaraq yazır ki, 2023-cü ilin yanvar-fevral aylarında Azərbaycana gələnlərin 35,1 faizi, Azərbaycandan gedənlərin 29,7 faizi dəmir yolu və avtomobildən yararlanıb: “Rəsmi qurumlar deyir ki, quru sərhədlərdən keçənlər yükdaşıyan avtomobillərin sürücüləri və yükləri müşayiət edən şəxslərdir. Bu izah inandırıcı deyil. Xaricə quru yolla gedənlərin əksəriyyəti, çox güman, Naxçıvan bölgəsinin sakinləridir, muxtar respublikada Türkiyə sərhədi açıqdır, xaricdən gələnlərin bəzilərinə isə, belə çıxır, özəl şərait yaradılır”.
Novator.az-ın məlumatına görə, Natiq Cəfərli qeyd edir ki, quru sərhədləri bağlı saxlamaq konstitusiyanı pozur: “Əvvəla, ölkə vətəndaşlarına bərabər münasibət pozulub. Naxçıvan qeydiyyatı ilə, məsələn, Kürdəmir qeydiyyatı olan vətəndaş arasında nədən fərq qoyulmalıdır?
İkincisi, bu mənasız qadağa bəziləri üçün, deyəsən, qazanc üsuluna çevrilib, kimlərisə sərhəddən müəyyən maraqlar müqabilində buraxırlar.
Quru sərhədlər mütləq açılmalıdır, bu qadağanın pandemiya ilə heç bir əlaqəsi yoxdur”.
