Diqqət mərkəzə!
Aprelin 10-da “Dövlət qulluğu haqqında” qanuna dəyişiklikləri imzalayan prezident İlham Əliyev yeniliklərin tətbiqinə fərman verib. Novator.az-ın məlumatına görə, vətəndaş cəmiyyəti eksperti Rövşən Ağayev yazır ki, yenilənən qanunvericilik şəhər və rayonların icra hakimiyyəti başçılarını özlərinə müavin təyin etmək səlahiyyətindən məhrum edir: “Bakı Şəhər İcra Hakimiyyəti başçısı müavinlərinin təyinatı prezidentin səlahiyyətindədir. Yerdə qalan inzibati vahidlərdə icra başçısı müavininin təyinatı üçün Prezident Administrasiyası rəhbərinin razılığı gərəkdir.
Sovetlərdən qalma yerli idarəçilik sistemi hətta həmin dövrlə müqayisədə daha yüksək mərkəzləşməyə məruz qalıb. Bu minvalla qəsəbə və kəndlərə icra nümayəndələrini də Bakıdan təyin etmək sistemi tətbiq olunacaq.
Azərbaycanda ifrat mərkəzləşmiş yerli idarəetmə vətəndaşdan çox uzaq, onun ehtiyaclarını duyub-hiss etməyən və görməzdən gələn bir sistemdir. Mərkəzləşmə gücləndikcə vətəndaşdan uzaqlaşma bir az da sürətlənir. Yerli idarəetmədə əks-mərkəzkəşmə – bölgə inkişafı üçün alternativi olmayan yol budur”.
Azərbaycanın rayonları, şəhərləri, şəhər rayonlarında icra hakimiyyətinin başçısı vəzifəsi 1991-ci il oktyabrın 18-də prezident fərmanı ilə yaradılıb. Yerli icra hakimiyyətlərinin başçılarını prezident vəzifəyə təyin edir.
