Devalvasiya maşınları necə qocaldıb?
Nazirlər Kabinetinin 29 mart 2023-cü il qərarı zavod buraxılış tarixinə görə yaşı 10 ildən çox olan minik avtomobillərinin (nadir minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycana gətirilməsini məhdudlaşdırır. Qərar dərc edildiyi gündən 30 gün sonra qüvvəyə minir.
Novator.az-ın məlumatına görə, bu məsələyə diqqət çəkən Bakı Araşdırmalar İnstitutu qeyd edir ki, 2021-ci ildə Azərbaycanda yaşı azı 10 il olan avtomobillərin sayı manatın devalvasiyaya uğramasından əvvəlki il – 2014-cü illə müqayisədə 58,7 faiz artıb, yaşı 5 ilə qədər avtomobillərin sayı 66,1 faiz, 5 ildən 10 ilə qədər avtomobillərin sayı 11,8 faiz azalıb.
Araşdırmada qeyd olunur ki, 2014-2021-ci illər arasında yaşı 5 ilə qədər yük maşınlarının sayında 69,5 faiz, 5 ildən 10 ilə qədər maşınların sayında 51,5 faiz azalma, azı 10 il olan maşınların sayında 41,4 faiz artım rəsmiləşib.
Eyni müddətdə yaşı 5 ilə qədər avtobusların sayı 53,3 faiz, 5 ildən 10 ilə qədər avtobusların sayı 33,7 faiz azalıb, azı 10 il olan avtobusların sayı 13 faiz artıb.
2015-2017-ci illərdə rəsmi məzənnəsi 0,7844 manatdan 1,7001 manata yüksələn ABŞ dolları 2018-ci il martın 7-dən banklara 1,7 manata təklif olunur.
