Konstitusiya Məhkəməsindən inzibati məsuliyyət qərarı
Konstitusiya Məhkəməsinin Plenumu Şəki Apellyasiya Məhkəməsinin müraciətini əsas tutaraq İnzibati Xətalar Məcəlləsinin 150.9-cu maddəsini 38, 145.1.6-cı və 146.1-1-ci maddələrlə əlaqəli şəkildə şərh edib.
Novator.az bildirir ki, 38-ci maddə müddətin keçməsi ilə bağlı inzibati məsuliyyətdən azad etməni, 145.1.6-cı maddə inzibati tənbeh tətbiq etmə haqqında qərarın icrasına xitam verilməsini tənzimləyir.
146.1-1-ci maddəyə əsasən, inzibati cərimə növündə inzibati tənbeh tətbiq etmə haqqında qərar qanuni qüvvəyə mindiyi gündən 5 il müddətində icra edilməyibsə, daha icra edilmir.
150.9-cu maddəyə görə, fiziki və ya vəzifəli şəxs barəsində inzibati cərimə növündə inzibati tənbeh tətbiq etmə haqqında səlahiyyətli orqanın (vəzifəli şəxsin) məcburi icraya yönəldilmiş qərarı 2 ay müddətində, məhkəmənin məcburi icraya yönəldilmiş qərarı isə 15 gün müddətində icra olunmadıqda icra məmuru inzibati xəta haqqında protokol tərtib edir, hüquqi şəxslərə münasibətdə isə məcburi icra tədbirləri davam etdirilir.
Konstitusiya Məhkəməsi Plenumunun aprelin 6-da açıqlanan qərarında qeyd olunur ki, inzibati xəta haqqında protokol qanunvericiliklə müəyyən edilmiş müddətdə tərtib olunmadıqda və nəticədə inzibati məsuliyyətə cəlbetmə müddəti keçdikdə, iş üzrə icraata xitam verilir: “Şəxs inzibati məsuliyyətə cəlb edilə bilmədikdə onun barəsində qəbul olunmuş inzibati cərimə növündə tənbeh tətbiqetmə haqqında qərar üzrə məcburi icra tədbirləri davam etdirilir. Şəxsin inzibati cərimə növündə tənbeh tətbiqetmə haqqında qərarın icra edilməməsinə görə təkrarən inzibati məsuliyyətə cəlb edilməsi istisna olunur”.
