Sistemli sistem
Respublikaçı Alternativ Partiyasının funksioneri, iqtisadçı Natiq Cəfərli sistem dəyişikliyi zərurətindən yazıb. Novator.az-ın məlumatına görə, o qeyd edir ki, konstitusiya islahatı, idarəetmənin təkmilləşdirilməsi, məhkəmə sisteminin yenilənməsi çox vacibdir: “Detallara varmasaq, bu addımlar vacibdir: yerli icra hakimiyyəti institutunun ləğvi, seçkili yerli özünüidarə institutunun təsisi; ölkənin inzibati-ərazi bölgüsünün dəyişdirilməsi, iqtisadi rayonlar bölgüsünə uyğun inzibati-ərazi vahidlərinin yaradılması; parlament seçkisində proporsional üsula keçid; dövlət və hökumət institutlarının təsnifatı, səlahiyyət-məsuliyyət bölgüsü və təyinatı mexanizmlərinin dəyişdirilməsi (bu sistemdə prezident dövlət başçısı rolunda qalır, xarici siyasət, təhlükəsizlik, hüquq mühafizə və xüsusi xidmət, ordu birbaşa prezidentin idarəçiliyində olur, o, bölgələrə nümayəndə təyin edir, baş nazir və Nazirlər Kabineti isə parlamentdən çıxır); hökumətin parlament qarşısında hesabatlılığının artırılması.
Belə bir sistemdə son günlər müzakirə mövzusu olan məsələlər də aktuallığını itirəcək. İnam Kərimovun kənd təsərrüfatı naziri postundan Ali Məhkəməyə sədr gətirilməsi yanlış bucaqdan müzakirə olunur. Yeni sistem formalaşanda nazir siyasi vəzifə olacaq, onun peşəsi deyil, seçkilərdə qalib gəlmiş siyasi partiyanın gündəliyini yerinə yetirmək qabiliyyəti önə çıxacaq. Yəni hüquqşünas kənd təsərrüfatı naziri olanda heç kimdə sual yaranmayacaq, iqtisadçı səhiyyə naziri postuna oturanda heç kim təəccüblənməyəcək”.
