Yaşı 10-dan artıq maşınlara qadağa
Martın 29-da Nazirlər Kabineti zavod buraxılış tarixinə görə yaşı 10 ildən çox olan minik avtomobillərinin (raritet (nadir) minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycana gətirilməsini məhdudlaşdırmağa qərar verib. Dərc edildiyi gündən 30 gün sonra qüvvəyə minəcək qərar insanların həyat və sağlamlığının və ətraf mühitin qorunması, avtonəqliyyat vasitələrindən atmosfer havasına atılan zərərli maddələrin miqdarının azaldılması və ekoloji vəziyyətin yaxşılaşdırılması məqsədilə əsaslandırılıb.
İqtisadçı alim, müxalif siyasətçi Qubad İbadoğlu yazır ki, qərar ölkədə köhnə avtomobillərin bahalaşmasına gətirib çıxaracaq: “Azərbaycana avtomobillər əsasən Gürcüstandan gətirilir. ABŞ-dan, Cənubi Koreyadan, məsələn, martin 29-da yola salınan avtomobil Gürcüstan limanlarına ən yaxşı halda 40-45 günə çatar, odur ki, belə qərarlar 30 gündən sonra deyil, 90 gündən sonra qüvvəyə minməlidir.
Nazirlər Kabinetinin qərarındakı “məhdudlaşdırılsın” ifadəsi də sual doğurur. Bilinmir zavod buraxılış tarixinə görə yaşı 10 ildən çox olan minik avtomobillərinin gətirilməsi tam yasaqlanır, yoxsa istisnalar olacaq”.
