Pensiyaçıların sayı 86,3 min nəfər azalıb
Rəsmi hesabata görə, 2023-cü il yanvarın 1-nə Dövlət Sosial Müdafiə Fondunda 1 milyon 114,2 min nəfər pensiyaçı qeydiyyatda olub. Novator.az bildirir ki, bir ildə pensiyaçıların sayı 86,3 min nəfər azalıb. 2022-ci il yanvarın 1-nə 1 milyon 200,5 min pensiyaçı vardı.
Aylıq pensiyaların orta məbləği 372,1 manat göstərilir.
Minimum pensiya 280 manatdır.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
Azərbaycanda bütün pensiyalar orta aylıq nominal əməkhaqqının illik artım tempinə uyğun indeksləşdirilir.
Yanvarda orta maaş ötən ilin ilk ayına nəzərən 11,8 faiz artıb.
