Dövlət komissiyasının iki aylıq hesabatı
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası bildirir ki, 2023-cü ilin yanvar-fevral aylarında hüquq mühafizə orqanları 2035 cinayət faktı aşkarlayıb: “Onların 659-u narkotik vasitələrin qanunsuz satışı, 1350-si qanunsuz əldə edilib saxlanması, 9-u narkotik xassəli bitkilərin qanunsuz kultivasiya edilməsi, 17-si bu kateqoriyadan olan digər cinayətlərdir”.
Qanunsuz dövriyyədən 1 ton 351,7 kiloqram narkotik vasitə və psixotrop maddənin çıxarıldığı xəbər verilir.
Hesabata görə, iki ayda 1194 nəfər cinayət məsuliyyətinə cəlb edilib.
Novator.az bildirir ki, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasına baş nazirin müavini Əli Əhmədov sədrlik edir. Daxili işlər naziri Vilayət Eyvazovun sədr müavini olduğu qurumda Baş Prokurorluğun, Prezident Administrasiyasının, Milli Məclisin, Nazirlər Kabinetinin, mərkəzi və yerli icra hakimiyyəti orqanlarının rəsmiləri və başqaları yer alır.
