Biznes düşmən sayılırsa…
Vergi Məcəlləsinə görə, sahibkarlıq fəaliyyəti göstərən və ardıcıl 12 aylıq dövrün istənilən ayında (aylarında) vergi tutulan əməliyyatlarının həcmi 200 min manatı ötən şəxslər əlavə dəyər vergisi ödəmək üçün qeydiyyata düşməyə borcludur. Bu məsələyə diqqət çəkən iqtisadçı, Respublikaçı Alternativ Partiyasının funksioneri Natiq Cəfərli yazır: “Dövlət Vergi Xidmətinin məmuru Elvin Məmmədli deyir ki, əlavə dəyər vergisi üçün qeydiyyata düşməyi məcbur edən 200 min manatlıq limitin azaldılması planlaşdırılır. Biz isə illərdir deyirik tam əksinə, limit 1 milyon manata qaldırılmalı, kiçik və orta sahibkarlara nəfəs verilməli, şərait yaradılmalıdır.
Bu hökumətin düşüncə tərzi, yanaşması biznesə qarşıdır, biznesi düşmən, təhlükə görür, demək istəyir ki, hər şey dövlətin, ya da dövlət içində dövlət olan iki-üç iri holdinqin əlində olmalı, biz hamımız onların işçilərinə çevrilməliyik. Yəni onlar çörəkverən olmalıdır, biz də çörək qədri bilən. Çox yanlış, təhlükəli yolla gedirlər, altını da ən çox özləri çəkəcəklər”.
Novator.az-ın məlumatına görə, Natiq Cəfərli qeyd edir ki, bütün dünyada əsl sabitliyin sütunu orta sinif, kiçik və orta biznes olub, olur, olacaq: “Bizim hökumət bunu anlamasa, toplumu radikallaşdırmaqda davam edəcək, itirəcəyi ancaq buxovları olan kəsimin yaranmasına rəvac verəcək”.
