Zaman məsələsi
Əli Kərimli
AXCP sədri
Allah Cəfər Cabbarlıya rəhmət eləsin. Rusiyanın 1905-ci ildə ermənilərlə azərbaycanlıları vuruşdurmasını yığcam bir şəkildə ifadə edib: “Atan kazaklardır”.
118 il sonra da dəyişən bir şey yoxdur. Cənubi Qafqazda hələ də “atan kazaklardır”.
Rusiya Azərbaycanla Ermənistanın sülh sazişi imzalamağa hazırlaşmasını heç cür qəbul etmir. “Biz ölmüşük ki, siz müharibəni bitirmək istəyirsiz?” demək istəyir. Demək istəyir ki, müharibəni sizmi başlamısız, siz də özbaşına bitirəsiz? Azərbaycana da, Ermənistana da, bütün dünyaya da mesaj verir ki, boş planlar cızmayın, bizsiz sülh masaları qurmayın, biz bitdi demədən bu müharibə bitməz, imkan vermərik.
Bəs on illərlə davam edən bu qapalı dairədən çıxış, çarə yoxmu? Nə vaxta qədər heç bir nəticə verməyən itkilər, nə müharibə, nə sülh vəziyyəti davam edəcək?
Əlbəttə, çarə var. Çarə şər mərkəzinin, yeni imperiya iddialarının məğlub edilməsidir. Ediləcək, zaman məsələsidir. Çarə Azərbaycanın da, Ermənistanın da Kremlin maşalarından, beşinci kolonlarından qurtuluşudur. Qurtulacağıq, bu da zaman məsələsidir.
