“Bir tək Azərbaycan hökuməti dirəşib ki…”
İqtisadçı, REAL Partiyasının funksioneri Natiq Cəfərli Azərbaycanda tətbiq olunan xüsusi karantin rejiminin uzadılmasını pisləyib.
2020-ci il martın 31-dən hökm sürən karantin rejimi hazırda ölkəyə giriş-çıxışa məhdudiyyət qoyur – quru sərhədlər bağlıdır. Rejimin martın 1-də başa çatması nəzərdə tutulmuşdu, ancaq Nazirlər Kabinetinin 21 fevral qərarı ilə müddət mayın 1-dək uzadılıb.
Novator.az-ın məlumatına görə, Natiq Cəfərli yazır ki, dünya “karantin”, “koronavirus”, “məhdudiyyətlər” kimi absurd yanaşmalardan imtina edib: “Quru sərhədləri rəsmən bağlı olan heç bir ölkə yoxdur, hətta Türkmənistan və Şimali Koreyada da sərhəd bağlı deyil, xüsusi icazə ilə sərhədi keçmək mümkündür. Mart ayında Dünya Səhiyyə Təşkilatının (DST) axmaq və absurd “pandemiya” qərarını ləğv edəcəyi gözlənir. Bir tək Azərbaycan hökuməti dirəşib ki, pandemiya var, karantin olmalıdır, quru sərhədləri də bağlı saxlamaq lazımdır! Martda DST “pandemiyanı” ləğv etsə, bizim hökumət nə deyəcək? Ölkədə aktiv xəstə sayı 100 nəfərdən bir az çoxdur, deməli, quru sərhədləri “pandemiya” bəhanəsi ilə qapalı saxlamaq məntiqsizlikdir”.
Koronavirus infeksiyası 2019-cu ilin dekabrında Çində üzə çıxaraq dünyanı bürüyüb. 2020-ci il martın 11-də Dünya Səhiyyə Təşkilatı rəsmən pandemiyanın başlandığını elan edib.
Azərbaycanda infeksiyaya ilk yoluxma 2020-ci il fevralın 28-də qeydə alınıb. Ümumi hesabata görə, ölkədə 828395 nəfər koronavirusa yoluxub, onların 10105-i vəfat edib, 145-i aktiv xəstədir, qalanları sağalıb.
