Torbalı yanlış
Fevralın 15-dən Azərbaycanda istehlak malları və məhsulların daşınması üçün nəzərdə tutulan, qalınlığı 15-50 mikron olan polietilen torbalar ayrıca məhsul növü kimi təqdim edilir. Bu, Nazirlər Kabinetinin 2 fevral 2021-ci il qərarının tələbidir. Ticarət şəbəkələri və mağazalarda iri ölçülü polietilen torbalara 5 qəpik, kiçik ölçülü torbalara 3 qəpik qiymət qoyulub.
Novator.az-ın məlumatına görə, yeniliyi şərh edən iqtisadçı, REAL Partiyasının funksioneri Natiq Cəfərli yazır ki, dünyada belə bir yanaşma çoxdan var: “Ekologiyaya ciddi ziyan vuran polietilen torbalardan imtina olunur. Lakin Azərbaycanda axırda görülməli olan işi əvvəldə görürlər. Avropa ölkələrində, ABŞ-ın bəzi ştatlarında belə qaydaların tətbiqi üçün güclü təbliğat aparılıb, sosial çarxlar hazırlanıb, parça torbaların pulsuz paylanması aksiyaları keçirilib, yalnız bunlardan sonra polietilen torbaların pullu olmasına qərar verilib. Azərbaycanda yetərli təbliğat, maarifləndirmə aparmadan polietilen torbaların pulla satılması ilə problemi həll edəcəklərini düşünürlər. Səhv yanaşmadır. Azərbaycan alıcısı 3-5 qəpiyə görə polietilen torbadan imtina etməz.
Ticarət şəbəkələrində və marketlərdə polietilen torbaların ödənişli olması ideya kimi anlaşılandır, amma bunun Azərbaycanda tətbiqi, reallaşdırılması problemlərə səbəb olacaq. Polietilen torbalardan imtina insanların könüllü davranışından doğmalıdır. Daha yaxşı olardı ki, marketlərin qarşısında aksiyalar təşkil olunsun, pulsuz parça torbalar paylansın. Dövlət bunun üçün ekoloji təşkilatlara qrant vəsaiti də ayıra bilərdi”.
