Xaricdə oxuyanın daxildəki problemi
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu xaricdə təhsil alan tələbələrin bəzi problemlərinə toxunub. Novator.az-ın məlumatına görə, o qeyd edir ki, gənclərin xarici ölkələrin nüfuzlu ali təhsil müəssisələrində dövlət hesabına oxumaları üzrə proqram 2022-2026-cı illərdə ümumilikdə 2000 nəfərin bakalavr və magistr təhsil almasına imkan verir.
İlk belə dövlət proqramının 2007-2015-ci illəri əhatə etdiyini xatırladan Qubad İbadoğlu Azərbaycan gənclərinin xaricdə təhsilə müxtəlif səbəblərdən üz tutduğunu vurğulayır: “Bir səbəb də daxili təhsildə ödəniş haqlarının yüksək olması, ali məktəblərə qəbul üçün müxtəlif fənlərdən hazırlığa xeyli məsrəfin getməsidir. Bir çox ailə bu xərcləri qarşılaya bilmir, övladını illərlə dörd-beş fəndən hazırlığa göndərmək əvəzinə ingilis dilinə yönəldir, Türkiyənin ucuz əyalət universitetlərində təhsilə yollayır.
Azərbaycanda universitetlərin çoxu Bakıda yerləşir, paytaxtda rayon gəncləri üçün yaşayış xərcləri çox, iş yerləri isə məhduddur. Ölkədə tələbələr üçün imtiyazlar yoxdur, onlar hətta Bakıda ictimai nəqliyyatdan güzəştli qiymətlərlə istifadə edə bilmirlər. Xaricdə isə tələbələr üçün güzəştlər var, gənclərin iş tapması da Azərbaycandakı qədər çətin deyil.
Başqa bir problem Azərbaycandan xaricə, xüsusilə də Türkiyəyə uçuşların “Azərbaycan Hava Yolları” və “Türk Hava Yolları” şirkətlərinin inhisarı üzündən bahalığıdır. Tələbələr illərlə bu səbəbdən tətil dövründə ailələri ilə görüşə bilmirlər. Hazırda Türkiyədə 27 minədək tələbə təhsil alır. Onlar ölkəyə bahalı hava yolu ilə qayıtmaq məcburiyyətindədir, çünki 2020-ci ilin yazından tətbiq olunan karantin rejimi ölkəyə giriş-çıxışa məhdudiyyətlər qoyub – quru sərhədlər bağlıdır. Gənclərin bu tip problemləri diqqətə alınmalı və həllini tapmalıdır”.
