Pensiyada artım faizi bilindi
Dövlət Statistika Komitəsinin 10 fevral məlumatına görə, 2022-ci ildə Azərbaycan iqtisadiyyatında muzdla çalışan işçilərin orta aylıq nominal əməkhaqqı əvvəlki ilə nisbətən 14,7 faiz artaraq 839,4 manat olub. Novator.az bildirir ki, bu açıqlama bütün pensiyaların yanvarın 1-dən 14,7 faiz artacağını göstərir.
Pensiyalar orta aylıq nominal əməkhaqqının illik artım tempinə uyğun indeksləşdirilir.
Fevralın 1-dən minimum pensiya 280 manatdır.
İlkin rəsmi statistikaya görə, 2023-cü ilin əvvəlinə ölkədə 1,1 milyon pensiyaçı qeydiyyata alınıb.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
Prezident İlham Əliyevin 10 fevral sərəncamında Əmək və Əhalinin Sosial Müdafiəsi Nazirliyinə pensiyaları orta aylıq nominal əməkhaqqının illik artım tempinə (14,7 faiz) uyğun, sığortaolunanların fərdi hesabının sığorta hissəsində 2023-cü il yanvarın 1-dək qeydə alınmış pensiya kapitalı məbləğlərini istehlak qiymətləri indeksinin illik səviyyəsinə (13,9 faiz) uyğun indeksləşdirmək tapşırılıb.
