Pensiya çağırışı
İqtisadçı, Azərbaycan Demokratiya və Rifah Partiyasının sədri Qubad İbadoğlu fevral pensiyalarının gecikməsinə diqqət çəkib. Novator.az-ın məlumatına görə, o yazır ki, adətən pensiyalar hər ayın ikinci həftəsi, uzağı ayın 9-da verilir: “Amma fevralda indeksləşdirmə gözləndiyindən pensiyaların verilməsi ləngiyir. Bununla bağlı rəsmi açıqlama yoxdur. Görünür, bu il üçün indeksləşdirmənin 15 faiz ətrafında olma ehtimalı əlavə suallar yaradıb, hökumət fikirləşir, bəlkə də faiz üzərində baş sındırır. Pensiyaları qanunun tələbinə uyğun indeksləşdirməyə və vaxtında ödəməyə çağırıram”.
Azərbaycanda pensiyalar orta aylıq nominal əməkhaqqının illik artım tempinə uyğun indeksləşdirilir. Dövlət Statistika Komitəsi 2022-ci ilin yanvar-noyabr aylarında muzdlu işçilərin orta aylıq nominal əməkhaqqının əvvəlki ilə nisbətən 14,6 faiz artdığını açıqlayıb. İllik yekun rəqəm bəlli deyil.
Fevralın 1-dən minimum pensiya 280 manatdır.
İlkin rəsmi statistikaya görə, 2023-cü ilin əvvəlinə ölkədə 1,1 milyon pensiyaçı qeydiyyata alınıb.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
