Gürcüstanlıların sığınacaq arzusu: statistika yayılıb
2014-2021-ci illərdə 111 min 528 Gürcüstan vətəndaşı Avropa İttifaqı məkanında sığınacaq almaq üçün rəsmi müraciət edib. Xəbəri Avropa Statistika Bürosuna istinadla Gürcüstan mənbələri yayıb.
Avropa İttifaqı 27 ölkəni birləşdirir: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Novator.az bildirir ki, statistikaya görə, 2014-2021-ci illərdə gürcüstanlıların 36 minə yaxını Fransada, 33 mini Almaniyada, 7695-i İtaliyada, 6730-u Yunanıstanda sığınacaq almağa cəhd göstərib.
Məlumata əsasən, 2022-ci ilin yanvar-noyabr aylarında Avropa İttifaqı məkanında 26 min nəfərə yaxın Gürcüstan vətəndaşından sığınacaq müraciəti alınıb, ilin ilk dörd ayında 390 gürcüstanlıya müsbət cavab verilib.
Gürcüstanlıların ölkədən getmək istəyinin əsas səbəbləri kimi işsizlik, yüksək inflyasiya, Rusiyanın Ukraynada apardığı işğalçı müharibə fonunda təhlükəsizlik qayğısı göstərilir.
