Dərinlikdə təhlükə?
Azərbaycan Demokratiya və Rifah Partiyasının sədri, iqtisadçı Qubad İbadoğlu dünyada seysmik fəallığın artdığını vurğulayaraq bir məsələyə diqqət çəkib. O yazır ki, 20 sentyabr 1994-cü ildə Xəzər dənizinin Azərbaycan sektorundakı karbohidrogen yataqlarının birgə işlənməsi və hasilat bölgüsü sazişi imzalanarkən 3500 metrdən çox dərinlikdə yerləşən laylardan karbohidrogen ehtiyatının çıxarılmasına qadağa qoyulub: “Amma Avropaya qaz tədarükünü artırmaq istəyən hakimiyyətin göstərişi ilə bu günlərdə BP şirkəti və tərəfdaşları 3500 metrdən çox dərinlikdə yerləşən təbii qaz ehtiyatlarını müəyyənləşdirmək üçün iki qiymətləndirmə quyusunun qazılmasına başlayıblar. Müsbət nəticələr olsa, dərin qatlardakı qazın hasilatına başlanacaq. Dərin laylardan qaz çıxarmaq geoloji təhlükələr və risklər yaradır”.
Novator.az bildirir ki, 1994-cü il sentyabrın 20-də Azərbaycanın iri karbohidrogen şirkətləri ilə 30 il müddətinə imzaladığı, “Əsrin müqaviləsi” kimi tanınan sənəd əsasında Azəri, Çıraq, Günəşli yataqlarından neft və qaz hasil olunur. 2017-ci il sentyabrın 14-də imzalanan yeni sazişlə hasilat müddəti 2050-ci ilə qədər uzadılıb.
