Tütün məmulatı və alkoqollu içki: yenilik sərəncamı verildi
Fevralın 7-də prezident İlham Əliyev tütün məmulatlarının və alkoqollu içkilərin idxalı, istehsalı sahəsində dövlət nəzarətinin gücləndirilməsinə sərəncam verib. Sənəd Nazirlər Kabinetinə bu məsələlərə dair təkliflərini altı ay müddətində prezidentə təqdim etmək tapşırığı qoyur:
– tütün məmulatlarının istehsalının və idxalının həyata keçirilməsi fəaliyyətinə görə icazə sisteminin tətbiqi və alkoqollu içkilərin idxalı və istehsalı ilə bağlı icazə sisteminin təkmilləşdirilməsi;
– tütün məmulatları üzrə aksiz vergisinin markaların (məcburi nişanlamanın) alınması zamanı əvvəlcədən ödənilməsi mexanizminin tətbiqi;
– alkoqollu içkilərin pərakəndə satışına dair minimum qiymət tələbinin müəyyən edilməsi;
– qanunvericiliyin tələblərini pozmaqla tütün məmulatlarının və alkoqollu içkilərin idxalını və istehsalını həyata keçirən şəxslərə qarşı məsuliyyət tədbirlərinin sərtləşdirilməsi;
– İqtisadiyyat Nazirliyinin və Kənd Təsərrüfatı Nazirliyinin təklifləri əsasında ölkə daxilində tütün məmulatlarının istehsalında yerli xammaldan istifadə həcmlərinə dair tələblərin müəyyən edilməsi.
İqtisadiyyat Nazirliyinə tütün məmulatlarına və alkoqollu içkilərə tətbiq edilən aksiz dərəcələrinin mərhələli olaraq artırılması istiqamətində aidiyyəti qurumlarla birlikdə razılaşdırılmış təkliflərini altı ay müddətində Nazirlər Kabinetinə təqdim etmək tapşırılıb.
