Savaşlardan yayınmaq
Əli Kərimli
AXCP sədri
Bölgəmiz tam bir barıt çəlləyidir. Yeni dünya düzəni yaradacaq savaş və münaqişələr ətrafımızda baş verir. Rusiya-Ukrayna savaşı ən qanlı mərhələsinə qədəm qoyur. Üstəlik, Rusiya zəiflədikcə dünyanı nüvə müharibəsi – üçüncü dünya müharibəsi ilə təhdid edir.
İranın nüvə silahı yaratmaqdan imtinası üçün beynəlxalq birliyin Tehranla apardığı danışıqlar da dalana dirəndi. Böyük ehtimalla İsrail və müttəfiqləri İranın nüvə proqramını əngəlləmək üçün hərbi əməliyyatlara baş vuracaq. Qonşu İran isə ehtimal olunan münaqişədən yayınmağa çalışmaq əvəzinə Azərbaycanı da gözlənən münaqişəyə cəlb etməyə sanki maraqlı görünür.
Digər tərəfdən isə biz hələ də sülh müqaviləsi ilə başa çatmamış bir müharibənin içindəyik. Beynəlxalq Böhran Qrupunun ekspertləri Ermənistan-Azərbaycan münaqişəsinin hətta yenidən qaynar mərhələyə keçə biləcəyini proqnozlaşdırır. Azərbaycanla Ermənistan arasında yeni müharibədə əsas maraqlı tərəf Rusiya ola bilər.
Bizim də daxil olduğumuz coğrafiya həqiqətən ən gərgin dövrünü keçirir. Şübhə etmirəm ki, ətrafımızda olan və olacaq savaşlar son nəticədə məhz beynəlxalq avtoritarizmi sarsıdacaq, dünyada yeni bir demokratikləşmə dalğasına təkan verəcək. Ancaq ölkəmiz üçün ən yaxşısı ətrafımızda olan və olacaq savaşlardan yayınmağı bacarmaqdır.
