2020-ci ilin yazından Azərbaycanda koronavirus infeksiyasına görə xüsusi karantin rejimi tətbiq olunur. Nazirlər Kabineti ölkəyə giriş-çıxışa məhdudiyyətə – quru sərhədlərin vətəndaşlar üçün qapalı olmasına qərar verib, sonuncu dəfə qadağanın müddətini 2023-cü il martın 1-dək uzadıb.

Novator.az-ın məlumatına görə, yanvarın 30-da şərh yayan Respublikaçı Alternativ Partiyasının funksioneri Natiq Cəfərli qeyd edir ki, quru sərhədlərin bağlı qalmasının əsas səbəbi bölgədəki ağrılı proseslər, gözlənən təhlükələrdir: “İranda ötən ilin sentyabrından yaşanan daxili gərginlik sərhədlərin bu motivlə bağlı qalması fikrini gücləndirmişdi. Tehrandakı Azərbaycan səfirliyinə 27 yanvar hücumu, terrordan sonra səfirliyin tam tərkibdə təxliyə edilməsi doğru qərardır. Son hücum və İranda baş verən hadisələr Azərbaycana bu ölkə ilə quru sərhədi bağlı saxlamağa tam legitim əsas verir.

Amma Gürcüstan, Türkiyə və Rusiya ilə quru yolları açmaq gərəkdir. Bizim tam haqqımız var ki, İranla quru sərhədləri bağlı saxlayaraq digər ölkələrlə yolları açaq. Bu həm də davranışlarına, ölkəmizə münasibətinə görə İran rejiminə yaxşı mesaj olar”.