Avtomobilə vergi güzəşti: ekspertin təklifi var
2022-ci il yanvarın 1-dən Azərbaycanda hibrid (həm benzin, həm də elektriklə işləyən) avtomobillərə vergi güzəşti tətbiq olunur. İstehsal tarixi 3 ildən və mühərrikinin həcmi 2500 kubsantimetrdən çox olmayan hibrid avtomobillərin idxalı və ölkədə satışı 4 il müddətinə əlavə dəyər vergisindən (ƏDV) azad edilib.
Novator.az-ın məlumatına görə, bu məsələyə diqqət çəkən iqtisadçı Natiq Cəfərli yazır ki, 2022-ci ildə Azərbaycan müxtəlif təyinatlı 74577 avtomobil idxal edib: “Onların ümumi dəyəri 1 milyard 57 milyon 800 min dollar göstərilir, ortalama hər avtomobilin qiyməti 14184 dollardır. İdxal olunan avtomobillərin sayı 2021-ci illə müqayisədə 13,1 faiz azalsa da, dəyər ifadəsində 18,2 faizdən çox artım qeydə alınıb. Bu o deməkdir ki, ölkəyə gətirilən avtomobillərın də ortalama qiyməti artıb.
2022-ci ildə ölkəyə 11337 hibrid, 486 sırf elektriklə işləyən maşın gətirilib. Elektriklə çalışan maşınların sayı 2021-ci ilə nəzərən 3 dəfə artıb.
Təəssüf ki, vergi güzəşti son 3 ildə istehsal edilən elektrikli maşınlara tətbiq edilir. Bu məhdudiyyət məntiqsizdir – benzin və dizellə çalışan yeni avtomobilləri təşviq təyin etməyin məntiqi var, yeni avtomobillər ekoloji olaraq daha az zərərlidir. Amma elektriklə işləyən maşınlara belə yanaşma absurddur – 2010-cu il istehsallı elektrikli maşınla 2020-ci il istehsallı maşının ekoloji cəhətdən heç bir fərqi yoxdur. Hər ikisi elektriklə işləyir, ekologiyaya ziyan vurmur, çünki eyni texnoloji məntiqlə çalışır. Ona görə də hökumət elektrikli maşınlara tətbiq olunan 3 illik istehsal təşviqi məsələsinə yenidən baxmalı, istehsal tarixi 10 il, hətta daha çox olan avtomobillərə vergi güzəşti tətbiq olunmalıdır”.
