Pensiyaçıların sayı nə qədər azalıb?
Son bir ildə Azərbaycanda pensiyaçıların sayı 85 min nəfərdən çox azalıb.
Novator.az bildirir ki, 2022-ci ilin əvvəlinə ölkədə 1 milyon 200,5 min pensiyaçı vardı. İlkin rəsmi statistikaya görə, 2023-cü ilin əvvəlinə 1 milyon 115 min nəfərə yaxın pensiyaçı qeydiyyata alınıb.
2023-cü ildə əmək pensiyasının minimum məbləği 280 manat nəzərdə tutulur.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur.
2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır.
Əks halda pensiya yaşı çatan şəxsə yaşa görə müavinət verilir. Yaşa görə müavinətin məbləği 2023-cü il yanvarın 1-dən 220 manatdır.
2023-cü ildən bütün pensiyalar orta aylıq nominal əməkhaqqının illik artım tempinə uyğun indeksləşdiriləcək. Dövlət Statistika Komitəsi 2022-ci ilin yanvar-noyabr aylarında muzdlu işçilərin orta aylıq nominal əməkhaqqı əvvəlki ilin eyni dövrünə nisbətən 14,6 faiz artıb. İllik yekun rəqəm fevral ayında açıqlanacaq.
